ترقیاتی فنڈز کی ایک ایک پائی بغیر کسی تفریق اور تعصب کے، انتہائی منصفانہ اور شفاف طریقے سے صرف کی جا رہی ہے۔۔ رکن صوبائی اسمبلی فتح الملک علی ناصر کا بکرآباد بالا کے لنک روڈ کی افتتاحی تقریب سے خطاب

چترال (نمائندہ چترال میل )) چیئرمین ڈسٹرکٹ ڈیولپمنٹ ایڈوائزری کمیٹی لوئر چترال اور رکن صوبائی اسمبلی فتح الملک علی ناصر نے کہا ہے کہ ماضی میں ہر دور میں چترال کے لیے ترقیاتی فنڈز ریلیز ہوتے رہے، لیکن یہ تاریخ میں پہلی بار ہو رہا ہے کہ ان فنڈز کو علاقے کی حقیقی ترقی، خوشحالی اور عوام کی فلاح و بہبود کے لیے ایمانداری سے استعمال کیا جا رہا ہے۔ان خیالات کا اظہار انہوں نے بکرآباد بالا کے لنک روڈ کی افتتاحی تقریب سے خطاب کرتے ہوئے کیا، جس پر 25 لاکھ روپے کی لاگت آئی ہے۔ انہوں نے واضح کیا کہ ترقیاتی فنڈز کی ایک ایک پائی بغیر کسی تفریق اور تعصب کے، انتہائی منصفانہ اور شفاف طریقے سے صرف کی جا رہی ہے۔ ہمارا مقصد ہر کام میں ‘انصاف’ کو برقرار رکھنا ہے۔فتح الملک علی ناصر کا کہنا تھا کہ عوام پارٹی قائد اور بانی عمران خان سے اپنی جان سے بڑھ کر محبت کرتے ہیں، کیونکہ وہ جانتے ہیں کہ صرف خان صاحب ہی ان کے حقیقی نجات دہندہ ہیں۔انہوں نے بکرآباد بالا کے عوام کو یقین دلایا کہ ان کے دیہی مسائل کو ترجیحی بنیادوں پر حل کیا جائے گا، خصوصاً پینے کے صاف پانی کے مسئلے کو اولین ترجیح دی جائے گی۔ لنک روڈ کی افتتاح کے بعد، ایم پی اے فتح الملک علی ناصر نے جوغور اور گولدور کے علاقوں کا بھی دورہ کیا، جہاں انہوں نے اپنے فنڈز سے مکمل ہونے والے متعدد دیگر ترقیاتی منصوبوں کا باقاعدہ افتتاح کیا۔اس پروقار تقریب میں رکن صوبائی اسمبلی کے خصوصی سیاسی مشیر نوید احمد بیگ کوہکن سمیت دیگر اہم پارٹی رہنما جن میں زبیر، حیات الرحمن، نذیر احمد، اور محبوب احمد شامل تھے، بھی بڑی تعداد میں موجود تھے۔ بکرآباد کے مقام پر چترال کے سینئر صحافی فخر عالم نے مہتر چترال فاتح الملک علی ناصر کو چترالی اون اور لکڑی سے بنے ہوئے روایتی تخائف پیش کئے۔