گرم چشمہ (نمائندہ چترال میل)آج گرم چشمہ میں ایل ڈی ایف کے زیر اہتمام پرامن مگر بہت بڑے احتجاجی جلسے کا انعقاد کیا گیا جس میں تجار یونین اور ڈرائیور یونین کی بھر پور شرکت نے جلسہ کی اہمیت اور علاقے کے مسائل کو اجاگر کرنے میں بہترین کردار ادا کیا۔ جلسے کا آغاز تلاوت کلام پاک سے کیا گیا۔ تلاوت کلام پاک کے بعد ایل ڈی ایف کے جنرل سیکریٹری نظار شاہ نے گزشتہ ہفتے ہونے والے جلسے کے دوران کئے گئے مطالبات کے بارے میں جلسے کے شرکاء کو آگاہ کیا۔انہوں نے کہا کہ ہمیں احتجاج پر مجبور کیا جارہا ہے یہ لوگوں کا جم غفیر اس بات کا ثبوت ہے کہ علاقہ کتنے بڑے مسائل کا شکار ہوا اور ارباب اختیار صرف تماشا دیکھ رہے ہیں۔ ایل ڈی ایف کے صدر نصرت الہی نے اپنے خطاب میں کہا کہ ہم این ایچ اے کے آنے کے بعد انتہائی خوش تھے کہ ملک کا سب سے معتبر نام گرم چشمہ روڈ پر بہترین کام کرے گا مگر ہمیں این ایچ اے کے کام کرنے کے انداز اور انتہائی غیر ذمہ دارانہ رویہ دیکھ شدید دکھ ہوا ہے۔ آج ایک مہینہ ہوا چومبور پل ٹوٹنے کے بعد مگر این ایچ اے والے پل کی تعمیر کے بجائے علاقے کے لوگوں کا صبر آزما رہے ہیں۔ ہم آج اس پلیٹ فارم سے این ایچ اے حکام کو وارننگ دے رہے ہیں کہ وہ ہمارے صبر کا امتحان لینے کے بجائے اپنی ذمہ داریاں پوری کریں۔جس عارضی پل کی تعمیر کے وہ دعویدار ہیں وہ پل گرم چشمہ کے عوام نے ایل ڈی ایف، ڈرائیور یونین اور بازار یونین کے رضاکاروں کے ذریعے بنایا ہے۔ این ایچ اے نے اس پل پر کیا خرچ کیا جو اس کا کریڈیٹ لے رہا ہے اور کیا یہ پل انسانوں کے سفر کے قابل ہیں۔ اپنے اے سی والے کمروں سے باہر آکر کبھی فیلڈ میں آکر اپنے کرتوتوں کا معائنہ بھی کیا کریں۔ خطیب جامع مسجد گرم چشمہ نے کہا کہ جب تک حق مانگا نہیں جائے گا اس وقت تک کوئی بھی آپ کا حق کبھی نہیں دے گا۔ این ایچ اے والوں اب تک ہمارا پرامن احتجاج دیکھا ہے۔ ہم اپنے حق کے حصول کے لئے کسی بھی دروازے تک جانے کو تیار ہیں یہ احتجاج یہاں سے شروع ہوا ہے مگر مطالبات پر کام شروع نہ ہونے کی بنا پر ہم ڈی سی آفس، این ایچ اے کے دفتر اور صوبائی اسمبلی کے سامنے بھی دھرنا دینے کو تیار ہیں۔سماجی کارکن خوش محمد نے کہا کہ اداروں کے ذمہ داروں کا یہ حال ہے وہ اپنے پرتعیش دفترات سے باہر آنے کو تیار نہیں۔ وہ صرف مراعات لینے کے لئے وہیں بیٹھے ہوئے ہیں کام کرنے کے لئے کوئی نہیں۔ ہم ایل ڈی ایف کے مشکور ہیں کہ لٹکوہ کے عوام کو ایک پلیٹ فارم پر متحد کردیا۔ اتحاد کے اس پلیٹ فارم سے ہم این ایچ اے کے چیئرمین کی انتہائی غیرذمہ دارانہ رویے کے مدنظر ان سے استعفے کا مطالبہ کرتے ہیں۔ ہمارے مطالبات اگر نہیں مانے گئے تو ہم اگلا دھرنا ڈی سی آفس چترال میں دیں گے۔ تجار یونین کے صدر گوہر شاہ نے کہا کہ ہمارے مطالبات اگر نہیں مانے گئے تو ہم مہینوں بازار بند رکھنے کو تیار ہیں۔ بازار کھولنے کا بھی کوئی فائدہ نہیں کیونکہ پل ٹوٹا ہوا ہے اور ہم سامان گرم چشمہ بازار پہنچا نہیں سکتے۔ ڈرائیور یونین کے صدر مہتاب نے کہا کہ جس عارضی پل کے بارے میں این ایچ اے والے دعوی کررہے ہیں وہ پل ہم نے بنایا ہے ایک مہینہ گزرنے کے باوجود کیوں پل پر اب تک کوئی ذمہ دار شخص نہیں آیا۔ یہ لوگ ہمارا تماشا بنا رہے ہیں۔ ہمارے صبر کا پیمانہ لبریز ہونے سے قبل پل کی مرمت کا کام مکمل کیا جائے۔ ورنہ ہم کل سے شروع ہونے والے پہیہ جام ہڑتال کو مہینوں تک برقرار رکھ سکتے ہیں۔ کریم آباد سے تعلق رکھنے والے ایل ڈی ایف کے سینئر ممبر اور ممتاز سماجی کارکن میردولہ نے کہا کہ ہم لٹکوہ ڈیویلپمنٹ فورم کا ہر طرح سے ساتھ دینے کے لئے تیار ہیں۔ آج ہم کریم آباد سے صرف آپ لوگوں کے ساتھ یک جہتی کے لئے آ:ے ہیں۔ آپ لوگ جو بھی فیصلہ کریں گے ہمیں اپنے شانہ بشانہ پائیں گے۔ آخر میں چیئرمین ایل ڈی ایف نے تمام شرکاء کا شکریہ اداکرنے کے بعد کہا کہ لٹکوہ ڈیویلپمنٹ فورم، تجار یونین،ڈرائیور یونین اور یہاں موجود علاقے کے عوام اپنے کسی ذاتی مقصد کے لئے یہ احتجاج نہیں کررہے ہیں بلکہ ایک قومی مسئلے پر آواز اٹھارہے ہیں آپ سب ہماری ایک کال پر ہمیشہ یہاں آتے ہیں اس کے لئے ہم آپ سب کے مشکور ہیں۔ ہمارے مطالبات پر این ایچ اے اور دوسرے ذمہ دار ادارے ٹس سے مس ہونے کو تیار نہیں ہیں اس لئے لٹکوہ ڈیویلپمنٹ فورم، تجار یونین اور ڈرائیور یونین علاقے کے عوام کی مفاد کے پیش نظر آج سے مسائل کے حل تک دھرنے کا اعلان کررہے ہیں۔ ہم گرم چشمہ پولو گراؤنڈ میں چوبیس گھنٹے موجود رہیں گے۔ ہمیں معلوم ہے کہ گرم چشمہ کے عوام ہمارا ساتھ دیں گے۔
تازہ ترین
- ہومداد بیداد۔۔ڈاکٹر عنا یت اللہ فیضی۔۔عبد الغنی دول ما ما
- سیاستتحصیل کونسل چترال کے اجلاس میں ضلعی انتظامیہ کی طرف سے حالیہ بارشوں کے نتیجے میں ہونے والے نقصانات کی اسیسمنٹ کی تاریخ میں کم ازکم دس دن کی توسیع کا مطالبہ کرتے ہوئے موجودہ طریقہ کار پر بھی عدم اطمینان کا اظہا رکیا گیا
- ہومترال شہر اور مضافات کے سینکڑوں تندورمالکان نے حکومت سے پرزور مطالبہ کیا ہے کہ چترال کی علاقائی مشکلات اورحالات کو پیش نظر رکھ کر روٹی کا پرانا نرخ بحال کردے
- Uncategorizedداد بیداد۔۔۔ڈاکٹر عنا یت اللہ فیضی۔۔۔چارویلو رحمت ولی خان مر حوم
- ہومحالیہ بارشوں اور قدرتی آفات کے حوالے سے چترال سے تعلق رکھنے والے ایم این اے غزالہ انجم وزیر اعظم پاکستان شہباز شریف سے ملاقات کرکے اہالیان چترال کی مشکلات سے آگاہ کیا۔
- ہومحالیہ بارش اور برفبار ی کے نتیجے میں عوامی مشکلات کے بارے میں پارٹی کی ہائی کمان سے رابطہ کرکے فوری طور پر ریلیف پیکج کی فراہمی کا مطالبہ ۔ عبدالولی خان عابد ایڈوکیٹ
- ہومصحافی کسی بھی علاقے میں عوام کے آنکھ اور کان کی حیثیت رکھتے ہیں ۔۔ ڈسٹرکٹ پولیس افیسر لویر چترال افتخار شاہ
- ہوملویر چترال کے دروش ٹاؤن کے گاؤں شیشی آزوردام،حفیظ آباد، جزیر دوری میں کئی دنوں کی مسلسل بارش کی وجہ سے زمین سرک گئی جس کے نتیجے میں تین گھر وں سمیت ایک جامع مسجد مکمل طور پر مٹی تلے دب گئے
- ہومبارش کی وجہ سے مزید تین دن سکول بند رہیں گے۔ نوٹیفیکیشن جاری
- ہومچترال کے طول وعرض میں گزشتہ 24گھنٹو ں سے مسلسل بارشوں کی وجہ سے مختلف مقامات پر دو افراد جان بحق ہوگئے اور کئی گھرمنہدم ہوگئے