چترال (نمائندہ چترال میل): سابقہ وی سی ناظم آنریری لیفٹننٹ شیر اعظم خان، صوبیدار میجر قلندر شاہ، میر باچا خان زار قوبت اور زار احمد خان نے دیگر شخصیات کے ہمراہ چترال میں ایک پریس کانفرنس سے خطاب کرتے ہوئے اہلیانِ لاسپور کے اہم مشترکہ اجلاس میں منظور کی گئی قرارداد پریس کے سامنے پیش کی۔ یہ اجلاس حال ہی میں سردار احمد خان یفتالی کی رہائش گاہ پر منعقد ہوا تھا جس میں وادیِ لاسپور کے نمائندوں نے بڑی تعداد میں شرکت کی۔
پریس کانفرنس سے خطاب کرتے ہوئے رہنماؤں نے کہا کہ اہلیانِ لاسپور ایم این اے محترمہ غزالہ انجم کے بے حد ممنون ہیں، جنہوں نے لاسپور میں موبائل نیٹ ورک کی خرابی کا نوٹس لیتے ہوئے اپنے فوکل پرسن و جنرل سیکریٹری مسلم لیگ (ن) چترال لوئر محمد کوثر ایڈوکیٹ، تحصیل صدر خواجہ امتیاز حسین، جنرل سیکریٹری اپر پرنس سلطان الملک، انفارمیشن سیکریٹری اپر ذاکر زخمی، اور صدر لیبر ونگ اپر چترال فضل الرحمن و فاروق ولی پر مشتمل ٹیم کو حقائق جانچنے کے لیے لاسپور بھیجا۔ اس ٹیم کی آمد اور کاوشوں سے موبائل نیٹ ورک کا مسئلہ کسی حد تک حل ہو چکا ہے۔
انہوں نے مزید کہا کہ الیکشن میں ووٹ نہ ملنے کے باوجود ایم این اے غزالہ انجم کا چترال کی ترقی، لواری اپروچ روڈ، شندور روڈ، کیلاش ویلیز کی سڑکوں اور ماڈل سکول کی تعمیر میں بنیادی کردار قابلِ تحسین ہے۔ رہنماؤں نے وزیراعظم میاں محمد شہباز شریف سے مطالبہ کیا کہ وہ ایم این اے غزالہ انجم کو مزید بااختیار بنائیں اور خصوصی فنڈز جاری کریں تاکہ چترال کے دور افتادہ علاقوں کے مسائل لوکل سطح پر حل ہو سکیں۔
پریس کانفرنس میں اہلیانِ لاسپور کی جانب سے درج ذیل اہم مطالبات سامنے رکھے گئے:
وادیِ لاسپور کے لیے فائبر آپٹک فوری فعال کیا جائے اور ہرچین لشٹ میں ٹیلی نار کا نیا ٹاور نصب کیا جائے۔
لاسپور کو پیسکو (PESCO) گرڈ سے منسلک کیا جائے تاکہ بجلی کی عدم دستیابی کے باعث بچوں کی تعلیم اور مقامی کاروبار کو ہونے والے نقصان کا خاتمہ ہو سکے۔
وادی میں نیشنل بینک کی برانچ کے قیام کے عمل کو تیز کیا جائے۔
شندور روڈ پر کام کے دوران شاہی داس سے لے کر سور لاسپور شپیر ماڑی تک عوام کی زیرِ کاشت زمینوں، فصلوں، پھلدار درختوں اور آبپاشی کے نالوں کو شدید نقصان پہنچا ہے۔ ایک خصوصی ٹیم تشکیل دے کر ان نقصانات کا ازسرِ نو تخمینہ لگایا جائے اور متاثرین کو فوری کمپنسیشن (مالی معاونت) فراہم کیا جائے۔
آخر میں رہنماؤں نے کہا کہ مسلم لیگ (ن) کی چترال کے لیے خدمات کسی سے ڈھکی چھپی نہیں ہیں۔ اہلیانِ لاسپور وزیراعظم میاں شہباز شریف کو خراجِ تحسین پیش کرتے ہیں اور امید ظاہر کرتے ہیں کہ وہ وادیِ لاسپور پر اپنا دستِ شفقت برقرار رکھیں گے۔
