چترال (نما یندہ چترال میل) خیبر پختونخواکے سابق چیف خطیب اور معروف دینی مبلغ مولانا ڈاکٹر محمداسماعیل نے روزنامہ مشرق پشاور کے چترال کے بیور و آفس کے اہتمام سے منعقدہ ایک خصوصی لیکچر میں میڈیا کے کارکنان پر زور دیاکہ وہ صرف سچ اور ٹھوس حقائق پر مبنی خبروں اور باتوں کو اشاعت کے لئے آگے بڑہائیں اور ان کے ہاتھوں حقائق کبھی مسخ نہ ہوں جس سے معاشرے میں بگاڑ اور بے چینی پیدا ہو۔ انہوں نے مقامی صحافیوں اور زندگی کے مختلف شعبوں سے تعلق رکھنے والے معززین کو توجہ دلاتے ہوئے کہاکہ اس وقت میڈیا ہر سو چھائی ہوئی ہے اور ہزاروں لاکھوں لوگوں تک پہلے کی نسبت بہت ہی آسانی سے پہنچ کر انہیں متاثر کرنے کے ساتھ رائے عامہ کو بھی مخصوص زاوئیے پر موڑ دیتی ہے اور بسااوقات حق اور باطل میں تمیز ہی مشکل ہوکر رہ جاتی ہے۔ انہوں نے کہاکہ ایسے حالات میں صحافیوں پر یہ ذمہ داری عائد ہوتی ہے کہ وہ اپنے پسند وناپسند اور ذاتی کو بالائے طاق رکھ کر حالات وواقعات کو سامنے لائیں۔ اس موقع پر معروف دانشور اور کالم نگار ڈاکٹر عنایت اللہ فیضی، ڈسٹرکٹ بار ایسوسی ایشن کے صدر نیاز اے نیازی ایڈوکیٹ، سینئر وکیل عبدالولی خان عابد ایڈوکیٹ، تجار یونین کے نائب صدر اظہر اقبال اور دوسروں نے ڈاکٹر محمد اسماعیل سے سوالات کئے۔ امیر جماعت اسلامی مولانا اخونزادہ رحمت اللہ بھی اس موقع پر موجود تھے۔ روزنامہ مشرق کے چترال میں بیورو چیف فخر عالم اور چترال پریس کلب کے صدر ظہیر الدین نے مہمان مقرر اور شرکاء کا شکریہ ادا کیا۔
