چترال (نمائندہ چترال میل) پبلک ریلیشنز آفیسر یونیورسٹی آف چترال کی طرف سے جاری کردہ پریس ریلیز کے مطابق جامعہ کے ششماہی تحقیقی جریدہ یونیورسٹی آف چترال جرنل آف ریلجس اسٹڈیز کو ہائیرایجوکیشن کمیشن اسلام آباد نے تسلیم کرنے کی باقاعدہ منظوری دیدی ہے۔ پریس ریلیز میں مزید کہاگیاہے کہ یونیورسٹی آف چترال نے محققین کی سہولت کیلئے جدید تقاضوں سے ہم آہنگ کل نو تحقیقی جریدے شروع کروائے ہیں جو کہ OJSکے جدید پلیٹ فارم پر آن لائن اور چھاپ شدہ دونوں صورتوں میں شائع ہورہے ہیں۔فی الحال ان میں سے یونیورسٹی آف چترال جرنل آف ریلجس اسٹڈیز کو ہائیر ایجوکیشن کمیشن اسلام آباد نے “وائی کٹیگری ” میں منظور کرلیاہے۔جبکہ بقیہ کی ایچ ای سی سے تسلیم کرانے کیلئے دفتری کاروائیاں جاری ہیں۔
پریس ریلیز کے مطابق اس جریدے کے اب تک پانچ شمارے شائع ہوچکے ہیں جن میں ملکی اور بین الاقوامی محققین کی تحقیق شائع ہوئی ہیں۔ یہ جریدہ پرنٹ، آن لائن اور سی ڈی روم ورژن کے تین ISSNنمبر اور DOIکی سہولت کے ساتھ شائع ہورہاہے اور اس جرنل کو دنیا کے گیارہ بڑے انڈیکسنگ ایجنسیوں نے انڈکس کیاہے۔ پریس ریلیز میں مزید کہاگیاہے کہ چترال جیسے دور افتادہ علاقے میں اعلیٰ معیار کے تحقیقی جریدوں کی اشاعت یقنیاً اس خطے میں تحقیقی کلچر کے فروغ میں سنگ میل ثابت ہوگی۔ مذکورہ جرنل تک اس کے اپنے ویب سائٹ www.jrs.uoch.edu.pk/ کے ذریعے دنیاکے کسی بھی کونے سے رسائی حاصل کی جاسکتی ہے۔