چترال (محکم الدین ) ممبر چترال چیمبر آف کامرس اینڈ انڈسٹری سرتاج احمد خان نے کہا ہے۔ کہ اب وقت آگیا ہے۔ کہ چترال کے لوگ معاشی استحکام کیلئے بزنس کی طرف توجہ دیں۔ اور اگر ایسانہیں کیا گیا۔ تو دوسروں کے دست نگر ہونے سے نہیں بچ سکیں گے۔ کیونکہ آنے والا وقت انتہائی طور پر معاشی مقابلے کا ہے۔ ان خیالات کا اظہار انہوں نے گذشتہ روز چترال بازار میں “چترال گروپ آف ٹریڈنگ ” کی افتتاحی تقریب سے خطاب کرتے ہوئے کیا۔ جس میں بزنس سے وابستہ بڑی تعداد میں لوگوں نے شرکت کی۔ انہوں نے کہا۔ کہ افسوس کا مقام ہے۔ کہ باہر سے لوگ چترال کو ایک کاروباری مارکیٹ قرار دے کر آئے روز اپنی بزنس قائم کر رہے ہیں۔ لیکن خود چترال کے لوگوں کے کانوں میں جوں تک نہیں رینگتی۔ چترال کا مستقبل تابناک ہے۔ اگر چترال کے لوگوں نے اس موقع سے فائدہ اُٹھانے کیلئے ابھی سے منصوبہ بندی نہیں کی۔ تو کف افسوس ملنے کے سوا کچھ نہیں ہو گا۔ چترال کے نوجوانوں کو کاروبار اور ٹیکنکل کاموں پر توجہ دینے کی ضرورت ہے۔ اور ان ہی کی وجہ سے وہ باعزت زندگی گزارنے کے قابل ہو سکیں گے۔ سرتاج احمد خان نے بیرونی دُنیا میں کام کرنے والے چترالیوں سے اپیل کی۔ کہ وہ چترال میں انڈسٹری لگانے پر توجہ دیں۔ اور ٹورزم میں سرمایہ کاری کریں۔ کیونکہ موجودہ حکومت ایسے افراد کی مدد فراہم کرنے پر یقین رکھتی ہے۔ انہوں نے کہا۔ کہ سی پیک منصوبے سے ہم اُس وقت استفادہ حاصل کر سکیں گے۔ جب اپنے ذہن کو کاروبار کیلئے تیار کریں۔ انہوں نے کہا۔ کہ مجھے خوشی ہوتی ہے۔ جب میں چترال کے کسی نوجوان کو کاروبار کرتے دیکھتا ہوں۔ جو اپنے اور اپنے خاندان کو سپورٹ کرنے کیلئے محنت کرتا ہے۔ انہوں نے کہا۔ کہ چترال کے لوگ کاروبار کے فروغ میں دوسرے غیر مقامی لوگوں کی طرح ایک دوسرے کی مدد کریں۔ سرتاج احمد خان نے چترال گروپ آف ٹریڈنگ کے سربراہ فضل رزاق اور اُن کی ٹیم کی تعریف کی۔ اور چترال چیمبر آف کامرس کی طرف سے ہر قسم کے تعاون کا یقین دلایا۔