چترال( نمائندہ چترال میل ): واٹر اینڈ پاور ڈویلپمنٹ اتھارٹی (واپڈا) نے اپنی سماجی ذمہ داری (سی ایس آر) کے اقدام کے تحت چترال کے گاؤں کوغذی میں گولین گول ہائیڈل پاور اسٹیشن کی کالونی میں ایک پرائمری اسکول قائم کر دیا ہے۔
تعلیمی سیشن کا باقاعدہ آغاز رواں ہفتے کے اوائل میں ہوا، جو اس خطے میں تعلیمی رسائی کو بہتر بنانے کی جانب ایک اہم قدم ہے۔ یہ اسکول واپڈا ملازمین کے بچوں اور مقامی کمیونٹی دونوں کو معیاری تعلیم اور سازگار تعلیمی ماحول فراہم کرنے کے لیے ڈیزائن کیا گیا ہے۔
علاقہ مکینوں اور مقامی عمائدین نے اس اقدام کو سراہتے ہوئے خیبر پختونخوا کے اس دور افتادہ علاقے میں جدید تعلیمی سہولت قائم کرنے پر واپڈا کا شکریہ ادا کیا ہے۔
علاقے کے سابق یونین ناظم اور مسلم لیگ (ن) کے ضلعی صدر ایڈووکیٹ عبد الولی خان نے کہا کہ یہ اسکول ضلع کے نوجوانوں کی تعلیمی فضیلت اور ذاتی نشوونما میں اہم کردار ادا کرے گا۔
چترال پریس کلب میں مقامی میڈیا سے گفتگو کرتے ہوئے انہوں نے اس تعلیمی منصوبے کو ‘انمول’ قرار دیا جس کے یونین کونسل کوہ میں سماجی و اقتصادی بہتری، کمیونٹی کی ترقی اور سماجی انصاف پر دور رس اثرات مرتب ہوں گے۔
انہوں نے امید ظاہر کی کہ وقت گزرنے کے ساتھ ساتھ اس اسکول کو ہائر سیکنڈری اور ڈگری لیول تک اپ گریڈ کیا جائے گا، اور یہاں تربیلا و دیگر پروجیکٹ ایریاز جیسا معیار برقرار رکھا جائے گا۔
انہوں نے اس اسکول کے تحفے پر وزیر اعظم شہباز شریف اور وزیر توانائی کا شکریہ ادا کیا، جبکہ گزشتہ ہفتے ہی سعید آباد میں وفاقی حکومت کے تعاون سے بننے والے دانش اسکول پر بھی کام شروع ہو چکا ہے۔
