چترال(نمائندہ چترا ل میل)دنیا کے بلند ترین پولو گراؤنڈ میں منعقد ہونے والا تین روزہ شندور فیسٹیول، جو 20 جون سے 22 جون 2025 تک جاری رہا، ہزاروں ملکی و غیر ملکی سیاحوں کو اپنی رعنائیوں اور ثقافتی رنگوں سے محظوظ کرنے کے بعد بخیر و خوبی اختتام پذیر ہوا۔
سنو لیپرڈ فاؤنڈیشن (ایس ایل ایف) چترال آفس نے وائلڈ لائف ڈیپارٹمنٹ اور ضلعی انتظامیہ اپر چترال کے اشتراک سے شندور فیسٹیول 2025 کے دوران ماحول دوست اور ذمہ دار سیاحت کے فروغ کے لیے بھرپور آگاہی مہم چلائی۔
شندور، جو کہ برفانی چیتے کا قدرتی مسکن اور لاسپور کے لوگوں کا چراگاہ ہے، فیسٹیول کے دنوں میں ہزاروں ملکی و غیر ملکی سیاحوں کا مرکز بن جاتا ہے۔ ان دنوں میں سیاحوں کی بڑی تعداد کی موجودگی کی وجہ سے روزانہ کی بنیاد پر بڑی مقدار میں کچرا پیدا ہوتا ہے، جو کھلے میدانوں میں پھینکا جاتا ہے۔ چونکہ ان دنوں مال مویشی بھی چراگاہ میں آزاد گھومتے ہیں، یہ گندگی کھانے کی صورت میں بیماریوں کا شکار ہو جاتے ہیں۔
ایونٹ کے اختتام پر اگرچہ ضلعی حکومت کی جانب سے صفائی کی جاتی ہے، تاہم ایونٹ کے دوران صفائی کا خاطر خواہ انتظام ممکن نہیں ہوتا۔ ایسے میں سیاحوں اور مقامی دکانداروں کی ذمہ داری بنتی ہے کہ وہ ماحول کو صاف رکھنے میں کردار ادا کریں۔
اسی مقصد کے تحت ایس ایل ایف چترال آفس ریجنل پروگرام منیجر جمیع اللہ شیرازی کی سرپرستی میں ضلعی انتظامیہ، وائلڈ لائف ڈیپارٹمنٹ اور مقامی کمیونٹی آرگنائزیشنز بشمول لاسپور کے کمیونٹی وائلڈ لائف گارڈز کے تعاون سے آگاہی واک، اعلانات، دکانداروں سے ملاقاتیں اور صفائی مہمات کا انعقاد کیا گیا۔ دکانداروں اور ہوٹل والوں کو پلاسٹک بیگز فراہم کیے گئے تاکہ وہ اپنا کچرا ان میں بند کریں، جسے بعد ازاں ٹی ایم اے عملہ مخصوص مقامات پر تلف کرے۔
مہم کو کامیاب بنانے پرایس ایل ایف نے تمام اسٹیک ہولڈرز، خاص طور پر ضلعی حکومت، وائلڈ لائف ڈیپارٹمنٹ اور مقامی تنظیمات کا شکریہ ادا کیا جنہوں نے تعاون کر کے اس اہم مہم کو کامیاب بنایا۔ شندور چونکہ برفانی چیتے کا مسکن ہے، اس لیے اس کی صفائی اور برفانی چیتے کے قدرتی ماحول کا تحفظ ایس ایل ایف کی ترجیحات میں شامل ہے۔
