(چترال میل رپورٹ)وزیر اعلی خیبرپختونخوا کے معاون خصوصی برائے اقلیتی امور وزیر زادہ نے کہاہے کہ وزیراعلی محمود خان چترال کی پسماندگی کو دور کرنے اور اسے دیگر ترقیافتہ علاقوں کے برابر لانے میں خصوصی دلچسپی رکھتے ہیں۔ وزیر اعظم عمران خان کے وژن کے مطابق چترال میں سیاحت کے فروغ کے لیے ٹھوس اقدامات اٹھائے جا رہے ہیں جنکی کوئی مثال نہیں ملتی۔ قلیل مدت میں چترال کو ایک ماڈل ضلع بنائیں گے۔ان خیالات کا اظہار انہوں نے گولین ویلی میں حفاظتی پشتوں کی تعمیر اور ریور کی چینلائزیشن کے منصوبوں کے افتتاح کے موقع پر کیا۔ مذکورہ منصوبوں کی تخمینہ لاگت 10 کروڑ سے زائد ہے۔ وزیر زادہ نے کہا کہ چترال کے مختلف علاقوں میں آبنوشی، انفرااسٹرکچر کی تعمیر سمیت دیگر منصوبوں کے لیے 40 کروڑ سے زائد رقم منظور ہوچکی اور ان منصوبوں پر بہت جلد عملی کام شروع کر دیا جائے گا۔وزیر زادہ نے کہا کہ چترال میں سیاحت اور مواصلات پر خصوصی توجہ دی جارہی ہے اور متعدد منصوبوں پر دو ارب سے زائد رقم خرچ کی جا رہی ہے۔ انہوں نے کہاکہ چترال سے رکن صوبائی اسمبلی مولانا ہدایت الرحمان کو دیگر ممبران سے زیادہ فنڈز جاری کرنا وزیراعلی محمود خان کا چترال سے محبت کا اظہار ہے۔ اس موقع پر وزیر زادہ نے کہا کے چترال کے عوام کے مسائل کا حل اولین ترجیح ہے۔