چترال (نذیرحسین شاہ نذیر) ضلع کونسل چترال نے منگل کے روز رواں مالی سال کا 4ارب69کروڑ15لاکھ 37ہزار روپے کا نظر ثانی شدہ بجٹ تخمینہ پاس کردیا جس میں 3ارب95کروڑ 92لاکھ روپے سیلری اور باقی نان سیلری اخراجات شامل ہیں۔اپر چترال کے ہیڈ کوارٹرز بونی میں ضلع کونسل کے کنوینر مولانا عبدالشکور کے زیر صدارت منعقدہ اجلاس میں ضلع ناظم مغفرت شاہ نے ڈرافٹ تجاویز پیش کردی جس پر موقع پر ہی بحث کے بعد اتفاق رائے سے منظوری دے دی گئی۔ بجٹ اجلاس سے خطاب کرتے ہوئے ضلع ناظم نے کہاکہ آج سے چار سال قبل جس نظام کے تحت ہم منتخب ہوآئے تھے، اس وقت بلند بانگ دعوے کئے گئے تھے کہ ضلعی سطح پر اختیارات عوام اور ان کے بلدیاتی نمائندوں کو دئے جارہے ہیں لیکن حقیقت اس کے برعکس نکلا اور یہ چار سال ضلع ناظم سے لے کر کونسلر تک کے لئے نہایت مشکل اور صبرا زما اور اعصاب شکن ثابت ہوئے اور اب حکومت نے اس نظام کو مزید بے وقعت کرنے کے لئے ضلعی سطح پر نمائندگی کا سلسلہ بھی ختم کردیا ہے۔ انہوں نے کہاکہ صوبائی حکومت نے ضلعی حکومتوں کی راہ میں روڑے اٹکانے کا کوئی موقع ہاتھ سے جانے نہیں دیا اور فنڈز کی ریلیز میں غیر ضروری اور غیر معمولی تاخیر سے ضلعی حکومتوں اور ٹی ایم ایز کو بے دست وپاکرکے رکھ دیا جبکہ فنڈز کی ریلیز سے پہلے ضلعی حکومتوں سے اخراجات کا گوشوار ہ طلب کرنا صوبائی حکومت کی خلاف ضابطہ کاروائی تھی۔ انہوں نے ضلعی حکومت کی کارکردگی پر مختصراً روشنی ڈالتے ہوئے کہاکہ موجودہ ضلعی حکومت نے بیرونی امداد سے ایک ملٹی سیکٹورل پراجیکٹ لانے کی کوشش کی لیکن صوبائی اور مرکزی حکومتوں کی سردمہری کی وجہ سے یہ منظور تو نہیں ہوسکی لیکن چترال گروتھ اسٹریٹیجی کے نام سے جو مستند دستاویز تیار کیا ہے جسے کسی بھی ڈونر کو پیش کیاجاسکتا ہے۔ ضلع ناظم نے اپر چترال کو الگ ضلعے کی حیثیت اختیار کرنے پر مبارک باد پیش کرتے ہوئے اس امید کا اظہارکیاکہ قدرتی وسائل سے بھر پور اس ضلعے کو پاکستان کے ماڈل اضلاع میں شامل کیا جائے گا۔ بجٹ پر بحث میں الحاج رحمت غازی، مولانا عبدالرحمن، عبدالقیوم، رحمت الٰہی، شیر عزیز بیگ، یعقوب خان، مولانا جاوید حسین، حصول بیگم، مفتی محمود الحسن، شیر محمد شیشی کوہ، شیر محمد ارندو، مولانا جاوید حسین اور دوسروں نے حصہ لیا۔ اس سے قبل تحصیل ناظم مستوج مولانا محمد یوسف نے ضلع کونسل کی بجٹ اجلاس کے لئے اپر چترال آنے پر ضلع ناظم اور ان کے ساتھ آنے والے ارکان کونسل کا شکریہ ادا کیا اور انہیں ہار پہنائے گئے۔ ڈپٹی کمشنر اپر چترال شاہ سعود نے بھی ضلع کونسل سے خطاب کرتے ہوئے کہاکہ وہ عوامی مسائل کے حل کے لئے دن رات کوشان ہیں اور عوام کو کسی بھی وقت دستیاب ہوں گے۔ ایڈیشنل ڈی سی اپر چترال محمد عرفان الدین، ٹی ایم او موڑکھو شفیق احمد، ٹی ایم او مستوج کریم اللہ بھی اس موقع پر موجود تھے جبکہ محکمہ خوراک کے ڈی ایف سی فضل باری کے سوا کسی بھی محکمے کا ضلعی سربراہ اجلاس میں موجود نہ تھا۔ اجلاس میں ایک قرار داد کے ذریعے جشن شندور کو حسب سابق چترال کی ضلعی انتظامیہ کے ذریعے سرانجام دینے کے بارے میں قرارداد متفقہ طور پر پیش کی گئی جبکہ ایک اور قرار داد میں مفتی محمود الحسن نے ڈیزاسٹر فنڈ ز کی ریلیز میں غیر معمولی تاخیر کا سلسلہ ختم کرتے ہوئے 2015ء میں تباہ کن سیلاب میں متاثرہ انفراسٹرکچروں کی بحالی کے فنڈز فی الفور جاری کرنے کا مطالبہ کیا۔ بعدازاں کنوینر مولانا عبدالشکور نے ضلع کونسل کا اجلاس غیرمعمولی مدت کے لئے ملتوی کردیا۔
تازہ ترین
- ہومچترال میں ٹیکس کے نفاذ کو مسترد کرتے ہوئے چترال کو پچاس سال مزید ٹیکس سے مثتثنی قرار دینے کا مطالبہ۔ پریس کانفرنس
- مضامیندھڑکنوں کی زبان۔۔۔محمد جاوید حیات۔۔۔”تعلیم کے دورازے اور غریب“..
- ہوممالاکنڈ ڈویژن میں مجوزہ ٹیکسوں کے نفاذ کے حوالے سے گورنر خیبر پختونخواہ نے اجلاس طلب کر لیا ہے۔ انجنئیر فضل ربی جان صدر پی پی پی
- ہومانتقال پرملال۔۔مفتاح الدین (المفتاح مڈیسن اسٹور اتالیق بازار چترال)ساکن زرگراندہ طویل علالت کے بعد انتقال کرگئے
- ہومڈھائی ہزار سال قدیم کالاش فیسٹول جو شی (چلم جوشٹ) ڈھول کی تھاپ پر نوجوان مردو خواتین کی گلے میں باہیں ڈال کر رقص،سریلی گیتوں اور اپنی رنگینیوں کے ساتھ کالاش ویلی بمبوریت کے مرکزی مقام بتریک میں اختتام پذیر ہوا
- ہومڈی۔پی۔او آفس بلچ لوئر چترال میں ہفتہ وار اردلی روم کا انعقاد کیا گیا۔
- ہومڈسٹرکٹ پولیس آفیسر لوئر افتخار شاہ کے زیر نگرانی منشیات فروشوں کے خلاف کاروائیوں کا سلسلہ جاری ہے۔
- ہومہزاروں سال قدیم کالاش تہوار “چلم جوشٹ ” پورے جوش و خروش کے ساتھ وادی رمبور کے معروف ڈانسنگ پلیس (چھارسو) گروم میں شروع ہوا۔
- کھیل*چیف سیکرٹری خیبرپختونخوا ندیم اسلم چوہدری کی زیر صدارت شندور پولو فیسٹیول کے انتظامات کے حوالے سے اجلاس کا انعقاد*
- ہوملوئر چترال میں 9 مئی کے حوالے سے ایک ریلی نکالی گئی