(چترال میل رپورٹ)ڈپٹی کمشنر دیر اپر عثمان محسود نے بعض اخبارات میں شائع اور ٹی وی چینلز پرچلنے والی ان خبروں کی سختی سے تردید کی ہے جن میں کہا گیا تھا۔ کہ مسلسل بارشوں اور برف باری کی وجہ سے لواری ٹنل روڈ سمیت دیر اپر کی مختلف سڑک بند ہوگئی ہیں۔ اور عوام شدید مشکلات سے دو چار ہیں۔ انہوں نے خبر کو حقیقت کے برعکس اور من گھڑت قرار دیا۔ اصل صورت حال کی وضاحت کرتے ہوئے ڈپٹی کمشنر دیر اپر نے بتایا کہ ضلع بھر میں تمام سڑکیں معمول کے مطابق کھلی ہیں جن پر گاڑیوں کی آمدرورفت جاری ہے۔ انہوں نے کہا کہ لورای ٹنل روڈ سمیت شاہ کوٹ، براول اور کوہستان تاپتراک تمام سڑکیں ہر قسم کی ٹریفک کے لئے صاف اور کھلی ہیں۔ انہوں نے مزید بتایا کہ ضلع بھر میں اکثر علاقوں میں بجلی سپلائی بغیر کسی رکاوٹ کے جاری ہے۔ صرف دو علاقوں میں بجلی کی فراہمی متاثر ہوئی ہے جس کے لئے متعلقہ ایس ڈی او کو ہدایات جاری کر دی گئی ہیں کہ وہ فوری طور پر بجلی کی فراہمی ان علاقوں کو یقینی بنائیں جس پر کام پوری تندہی سے جاری ہے اور بہت جلد بجلی کی فراہمی کو یقینی بنایا جائیگا۔ دریں اثناء آزاد ذرائع نے بھی چترال لواری ٹنل سڑک کے کھلے رہنے کی تصدیق کی ہے۔ ڈپٹی کمشنر نے میڈیا نمائندوں پر زور دیا ہے کہ وہ کسی خبر کو جاری کر نے سے پہلے متعلقہ اداروں سے ان کی تصدیق کروائیں تاکہ عوام میں بلاوجہ خوف اور پریشانی و مشکلات پیدا نہ ہوں