خیبرپختونخواحکومت نے ضلع چترال میں حال ہی میں واپڈاکے زیر نگرانی مکمل ہونے والے108میگاواٹ کے گولین گول پن بجلی گھرکے منصوبے سے چترال کے رہائشیوں کو بجلی کی عدم فراہمی پر سخت تشویش کا اظہارکرتے ہوئے وضاحت کی ہے کہ صوبائی حکومت نے مذکورہ بجلی گھر سے پیداہونے والی بجلی کی خریداری اور اسے اہلیان چترال کوہنگامی بنیادوں پر فراہم کرنے کے سلسلے میں ایک خط کے ذریعے وفاقی حکومت سے درخواست کررکھی ہے مگرپیسکوحکام ضلع اپر چترال کے عوام کو بجلی کی فراہمی میں لیت ولعل سے کام لے رہے ہیں جس سے چترال کے عوام میں سخت مایوسی پھیل رہی ہے۔ صوبائی محکمہ توانائی وبرقیات نے گولین گول پن بجلی گھر سے پیداہونے والی بجلی کی خریداری کے لئے پشاورالیکٹرک سپلائی کمپنی (پیسکو) کے چیف ایگزیکٹو کومورخہ 23جنوری بذریعہ ایک خط درخواست کی کہ اپرچترال کے عوام کے لئے ہنگامی بنیادوں پر بجلی فروخت کرکے فراہمی ممکن بنائی جائے اور جگہ کا بھی انتخاب کیا گیا ہے۔ تاہم پیسکوحکام کی جانب سے تاخیری حربوں کی وجہ سے چترالی عوام میں سخت مایوسی پائی جاتی ہے۔واضح رہے کہ سال 2015ء کوضلع چترال میں آنے والے تباہ کن سیلاب سے جہاں ہرطرف تباہی مچ گئی وہاں محکمہ توانائی کااپنا 4میگاواٹ، شیشی پن بجلی گھربھی مکمل طورپر تباہ ہوگیا تھا۔ جس کے بعد صوبائی حکومت نے چترال کے عوام کو ہنگامی بنیادوں پر بجلی کی فراہمی کے لئے متبادل ذرائع استعمال میں لاکر اقدامات اٹھائے ہیں۔