چترال (نما یندہ چترال میل) ضلع ناظم چترال مغفرت شاہ نے کہا ہے کہ وزیر اعلیٰ پرویز خٹک اور پی ٹی آئی کے قائد عمران خان کا 8نومبر کے دن چترال میں فقید المثال استقبال کیا جائے گا جس میں چترال کے عوام اپنی روایات کو برقرار رکھتے ہوئے اپنی سیاسی وابستگیوں سے بالا تر ہوکر حصہ لے رہے ہیں جبکہ چترال کو دو اضلاع میں تقسیم کرنے کے ممکنہ اعلان کے حوالے سے بھی عوام میں جوش وخروش پایا جاتا ہے۔اتوار کے روز پولو گراونڈ میں جلسہ گاہ میں انتظامات کا جائزہ لینے کے بعد چترال میل ڈاٹ کام سے خصوصی گفتگوکرتے ہوئے انہوں نے کہاکہ چترال میں سول سوسائٹی کی تنظیمیں بھی استقبال کو تاریخی بنانے کے لئے سرگرم عمل ہوگئے ہیں اور بازار کو سجانے کا کا م بھی شروع ہوگیا ہے۔ انہوں نے کہاکہ عمران خان اور پرویز خٹک کا اس وقت دورہ چترال انتہائی اہمیت کا حامل ہے اور چترال کے عوام اس دورے سے کئی توقعات وابستہ کئے ہوئے ہیں اور دو سال قبل سیلاب اور زلزلے سے تباہ حال انفراسٹرکچروں کی بحالی کے لئے ڈسٹرکٹ گورنمنٹ کو خاطر خواہ فنڈز کی فراہمی بھی متوقع ہے تاکہ عوام کو مشکلات کے دلدل سے باہر نکالے جاسکیں۔ انہوں نے کہاکہ چترال کے عوام سیاسی طور پر بیدار لوگ ہیں اور یہاں مثبت سیاسی روایات کو پروان چڑہاتے ہوئے کسی بھی سیاسی جماعت کے مرکزی رہنماؤں کے استقبال میں ایک دوسرے سے بڑھ چڑھ کر حصہ لیتے رہے ہیں۔