چترال میں سیاحت کے فروغ کے حوالے سے منعقدہ اجلاس، ضلعی یوتھ آفیسر مقرر۔ دیکھئے تفصیلی رپورٹ

(چترال میل رپورٹ)خیبر پختونخوا کے نگران وزیر برائے ماحولیات،کھیل وسیاحت محمد رشید خان نے کہا ہے کہ نگران حکومت سیاحت کے فروغ کے لیے ہر ممکن اقدامات اٹھا رہی ہے۔ خیبر پختونخوا ہمیشہ سے ہی سیاحوں کی خصوصی دلچسپی کا مرکز رہا ہے جس کی بنیادی وجہ اس خطہ کی قدرتی خوبصورتی ہے۔ ان خیالات کا اظہار خیبر پختونخوا کے نگران وزیر برائے ماحولیات، کھیل و سیاحت محمد رشید خان نے سول سیکرٹریٹ میں محکمہ سیاحت کے اعلیٰ حکام کے ساتھ چترال میں سیاحت کے فروغ کے حوالے سے منعقدہ اجلاس میں کیا جس میں سیکرٹری سیاحت محمد طارق، ایڈیشنل سیکرٹری بابر خان، ایم ڈی سیاحت مشتاق احمد اور صدرچترال چیمبر آف کامرس سرتاج احمد موجود تھے۔ صوبائی وزیر نے کہا کہ چترال میں سیاحت کے فروغ کے ساتھ ساتھ سیاحت سے وابستہ کاروباری سرگرمیوں کا فروغ بھی ہماری ترجیات میں شامل ہے جس کے لیے حکومتی سطح پر بھرپور تعاون کیا جا رہا ہے اس کے ساتھ ساتھ چترال میں جنگلات کی کٹائی کو روکنے کے لیے موثر اقدامات کئے جا رہے ہیں اور ہماری کوشش ہے کہ وہاں کے لوکل ہا ئیڈرو پلانٹس جس میں 106 میگا واٹ اور پیڈو 60 میگاواٹ بجلی پیدا کر رہے ہیں ان سے مقامی لوگوں کو سستی بجلی فراہم کرنے کے لیے جامع پالیسی تشکیل دی جائے، وہاں کے نوجوانوں کے لیے ہم نے چترال میں ضلعی یوتھ آفیسر مقرر کردیا ہے اس کے ساتھ یوتھ ہاسٹل بنایا گیا ہے علاوہ ازیں یوتھ کے لیے ایک یوتھ مرکز کا قیام بھی بہت جلد عمل میں لایا جا ئے گا۔