پشاور(نما یندہ چترال میل)محکمہ آبنوشی کی محکمانہ ترقیاتی ورکنگ پارٹی نے 737.028ملین روپے لاگت کے 41منصوبوں کی منظوری دے دی۔یہ منظوری محکمہ آبنوشی کی محکمانہ ترقیاتی ورکنگ پارٹی(DDWP) کے پیر کے روز سیکرٹری محکمہ آبنوشی نظام الدین کی زیر صدارت منعقدہ اجلاس میں دی گئی جس میں محکمہ ہائے خزانہ اور منصوبہ بندی و ترقی کے نمائندوں،محکمہ آبنوشی کے سینئر افسران بشمول ڈائریکٹر پلاننگ اینڈ مانٹیرنگ، ڈپٹی سیکرٹری(ٹیکنیکل)،چیف انجینئرز(جنوبی /شمالی) نے بھی سپرنٹنڈنگ اور ایگزیکٹیو انجینئرز کے ہمراہ شرکت کی۔محکمانہ ترقیاتی ورکنگ پارٹی نے اس موقع پر46ترقیاتی سکیموں پر تفصیلی غور و خوض کے بعد41سکیموں کی منطوری دی جن پر737.028 ملین روپے لاگت آئے گی۔ مذکورہ سکیموں میں سوات،شانگلہ،ایبٹ آباد،مانسہرہ،بونیر،مردان،کرک،پشاور،لکی مروت،دیر بالا،دیر پائیں،کوہستان، بٹگرام،ہری پور،کوہاٹ،ڈی آئی خان اور چترال کے اضلاع کی سکیمیں شامل ہیں جبکہ پانچ سکیمیں اس ہدایت کے ساتھ موخر کر دی گئیں کہ ان کی پراجیکٹس دستاویزات کو بہتر بنا کر ان کی خامیوں کو دور کیاجائے تاکہ ان پراجیکٹس کو بہتر طور پر بروقت شروع کیا جاسکے۔مذکورہ منظور کردہ پراجیکٹس میں پی کے۔06کی کئی یونین کونسلز25،28،41،48،57،79،80،81،82 اور87 میں پانی کی فراہمی اور نکاسی کی سکیموں کی تعمیر اور بحالی شامل ہے جبکہ لکی مروت میں شمسی توانائی پر مبنی پانی کی فراہمی کی سکیمیں،دیر بالا،سوات، کوہستان، بٹگرام، دیر پائیں اور چترال میں گریوٹی پر مبنی پانی کی فراہمی کی سکیمیں اور دیر بالا،دیر پائیں،ہری پور اور بٹگرام کے اضلاع میں غیر فعال سکیموں کی بحالی شامل ہے۔