پشاور (نما یندہ چترال میل)وزیراعلیٰ خیبرپختونخوا پرویز خٹک نے ایجو کیشنل ٹیسٹنگ ایوالویشن ایجنسی(ایٹا) کی ری سٹرکچر نگ اور استعداد کار میں اضافہ کے پلان کی منظوری دیتے ہوئے ہدایت کی ہے کہ ایٹا کے تحت امتحانات کے شفاف انعقاد کیلئے مطلوبہ سٹاف، کیمروں کی تنصیب، فیس ریڈنگ میکنزم، بائیو میٹرک سسٹم اور دیگر ضروریات پوری کرلیں۔ اس کے بغیر امتحانات کے انعقاد کی اجازت نہیں ہو گی۔ انہوں نے ہدایت کی کہ ایٹا کو سال بھر ٹیسٹنگ کیلئے تیار رہنا چاہیئے۔ اس مقصد کیلئے مطلوبہ استعداد پیدا کریں۔ وہ وزیراعلیٰ سیکرٹریٹ پشاور میں ایٹا کے بورڈ آف گورنرز کے 26 ویں اجلاس کی صدارت کر رہے تھے۔ وزیراعلیٰ کے مشیر برائے اطلاعات و اعلیٰ تعلیم مشتاق احمد غنی، محکمہ صحت اور اعلیٰ تعلیم کے انتظامی سیکرٹریوں اور دیگر متعلقہ حکام نے اجلاس میں شرکت کی۔ اجلاس میں بورڈ آف گورنر کے سابقہ اجلاس کے منٹس کی منظوری دی گئی۔ اجلاس کو سابقہ اجلاسون میں کئے گئے فیصلوں پر عمل درآمد، ایٹاکی آمدنی، اخراجات اور دیگر اُمور پر بریفینگ بھی دی گئی۔ اجلاس کو بتایا گیا کہ حیات آباد میں 81ملین روپے کی لاگت سے چھ کنال پر مشتمل ایٹا کی عمارت تیار کی گئی ہے۔اجلاس کو بتایا گیا کہ 2016 میں انجینئرنگ اور میڈیکل کے اُمیدواروں کا انٹری ٹیسٹ لیا گیا اور 24 گھنٹوں کے اندر نتائج کا اعلان کر دیا گیا تھا۔ وزیراعلیٰ نے ایٹا کی استعداد میں اضافہ کیلئے مطلوبہ ضروریات کی منظوری دیتے ہوئے ہدایت کی کہ ڈاکومنٹس شارٹ لسٹنگ کیلئے بھی پلان وضع کریں۔ انجینئرنگ میں کوالیفائی مارکس کے حوالے سے وزیراعلیٰ نے کہا کہ ایٹا مکمل نتائج متعلقہ ادارے کے حوالے کرے۔ پاس یافیل کا فیصلہ ادارہ خود کرے گا۔ وزیراعلیٰ نے ایک ماہ کے اندر ٹیسٹ کے انعقاد کیلئے مناسب حل نکالنے کی ہدایت کرتے ہوئے کہا کہ گرمی میں ٹیسٹ کے انعقاد کیلئے مناسب عمارت اور ماحول کا انتظام کیا جائے۔ملازمین کیلئے سال میں ایک بار دو تنخواہوں کے برابر اعزازیہ کی منظوری پہلے سے دی جا چکی ہے جبکہ ایٹا کی آئندہ آمدنی کو دیکھ کر سیلری پیکج پر نظر ثانی کرنے کا بھی فیصلہ کیا گیا۔
