چترال (نمائندہ چترال میل) چترال لوئر کے پریڈ گراؤنڈ میں آغا خان ایجنسی فار ہیبی ٹیٹ کے زیر اہتمام دو روزہ نمائش ‘انرجی وائز ایکسپو 2026’ کا باقاعدہ آغاز ہو گیا ہے۔ اس نمائش کا بنیادی مقصد چترال میں گرین انرجی کے مختلف پہلوؤں اور امکانات کو اجاگر کرنا ہے تاکہ ماحول کو محفوظ بنایا جا سکے۔نمائش کی باقاعدہ افتتاحی تقریب میں قائم مقام ڈی پی او چترال لوئر عتیق الرحمان مہمانِ خصوصی تھے، جبکہ آغا خان ایجنسی فار ہیبی ٹیٹ کے ریجنل پروگرام مینیجر انجینئر الطاف حسین شاہ نے ایکسپو کے مقاصد پر روشنی ڈالی۔ تقریب کے دوران ایس آر ایس پی (SRSP) کے ریجنل پروگرام مینیجر طارق احمد نے اپنی تنظیم کی جانب سے پریزنٹیشن دی، جبکہ اے کے آر ایس پی (AKRSP) کے مہربان خان نے توانائی کے شعبے میں اپنی تنظیم کے اقدامات اور منصوبوں سے شرکا کو آگاہ کیا۔ ایکسپو میں مختلف سکولوں کے طلباوطالبات کے اسٹالز شامل ہیں جن میں شرکاء نے گہری دلچسپی کا اظہار کیا