پشاور(نمائندہ چترال میل) ایم پی اے ہاسٹل میں مولانا عبد الاکبر چترالی (ایم این اے) کی صدارت میں اجلاس ہوا۔ جس میں ایم پی اے مولانا ہدایت الرحمن، سابق ایم پی اے سلیم خان، سماجی رہنما صادق امین، مجاہد خان اور سماء ٹی وی کے رپورٹر فیاض احمد نے شرکت کی۔ اجلاس کے شرکاء نے چترال میں قائم قرنطینہ مراکز میں حفاظتی انتظامات پر تحفظات کا اظہار کیا گیا، کیونکہ قرنطینہ سنٹر میں بتائے گئے پروٹوکول پر عمل درآمد نہیں کیا جارہا ہے۔ قرنطینہ میں کھانے پینے کے انتظامات نہ ہونے کے برابر ہے۔ اجلاس میں یہ بھی فیصلہ ہوا کہ لوئر اور اپر چترال میں کورونا وائرس سے نمنٹنے کیلئے الگ پالیسی نہیں ہونی چاہئے۔ تمام تر صورتحال پر بحث و مباحثہ کے بعد اس فیصلے تک پہنچے ہیں کہ چترال میں موجود تمام سکول بالخصوص ہائی سکول کو قرنطینہ سنٹر قرار دیکر اس میں تمام تر سہولیات کی فراہمی یقینی بنا کر مقامی لوگوں کو وہاں ٹھہرایا جائے۔ ان قرنطینہ سنٹر میں کھانے پینے کے علاوہ صاف بستروں کے انتظامات ہونے چاہئے۔اجلاس میں اس بات پر بھی تشویش کا اظہار کیاگیا کہ ضلعی انتظامیہ اور پالیسی کی کی تیاری میں کسی بھی اسٹیک ہولڈر ز کو اعتماد میں نہیں لیا جاتا ہے۔ لہذا ہم پرزور مطالبہ کرتے ہیں کہ موجودہ صورتحال سے نکلنے کیلئے ایک اعلی سطحی اجلاس بلایا جائے۔