(چترال میل رپورٹ)وزیر اعلیٰ خیبر پختونخوا پرویز خٹک نے کہا ہے کہ قائد اعظم کے اصولوں ایمان، اتحاد اورتنظیم کو اپنی زندگی میں شعار بنا کر ہی پاکستان کو ایک ترقی یافتہ ملک بنایا جا سکتا ہے۔ قائد اعظم کو خراج عقیدت پیش کرنے کا بہترین طریقہ یہ ہے کہ ہم ذاتی مفادات کو پس پشت ڈال کرملک میں ظلم اور کرپشن کے خلاف سیسہ پلائی ہوئی دیوار بن جائیں اور ایک شفاف فلاحی معاشرے کی تشکیل میں اپنا کردار ادا کریں۔ انہوں نے ان خیالات کا اظہار بانی پاکستان قائد اعظم محمد علی جناح کے یوم ولادت کے موقع پر جاری اپنے ایک پیغام میں کیا۔وزیراعلیٰ نے کہاکہ اگر ہم پاکستان کو صحیح معنوں میں قائداعظم کی بصیرت کا آئینہ دار بنانا چاہتے ہیں تو ہمیں ہر سطح پر ملک دشمن عناصر چاہے وہ اندرونی ہوں یا بیرونی، کے خلاف متحد ہونا ہو گااور پاکستان کو با وقار قوموں کی صف میں کھڑا کرنے کے لئے اپنا کردار ادا کرنا ہوگا۔وزیر اعلیٰ نے کہا کہ تحریک انصاف قائداعظم کی سوچ اور بصیرت کے مطابق نئے پاکستان کی تشکیل کیلئے کھڑی ہے۔ موجودہ صوبائی حکومت نے اسی وژن اور منشور کے مطابق نظام کی شفافیت کی ٹھوس بنیادیں رکھ دی ہیں۔ سابقہ حکومتوں کے من پسند اور ذاتی مفاد پر مبنی فیصلوں کی بجائے جمہوری انداز سے مسائل کو حل کرنے کا نظام متعارف کرایا ہے۔ وزیر اعلیٰ نے کہا کہ صوبے میں گڈ گورننس کے خواب کو شرمندہء تعبیر کرنے اور صوبے کو کرپشن فری بنانے کیلئے ریکارڈ قانون سازی کی اور معاشی، معاشرتی، سیاسی، ثقافتی اور تعلیم کے شعبوں میں انقلابی تبدیلیاں عمل میں لائی ہیں۔ انہوں نے کہا کہ انشاء اللہ وہ دن دور نہیں جب خیبر پختونخوا حقیقی معنوں میں قائد اعظم کی بصیرت کا آئینہ دار ہو گا اور نئے خوشحال پاکستان کی عملی بنیاد فراہم کرے گا۔