چترال(نمایندہ چترال میل) گندھارا ہند کو بورڈ پشاور نے 8 اکتوبر 2017کو چترال میں ایک روزہ ورکشاپ منعقد کرنے کا فیصلہ کیا ہے۔ اس سلسلے میں گندھارا ہند کو بورڈ پشاور آفس میں جی ایچ بی کے عہدہ داروں نائب صدر ڈاکٹر صلاح الدین اور جنرل سیکرٹری ضیاء الدین کی ورکشاپ کے کو آرڈنیٹر محکم الدین کے ساتھ میٹنگ ہوئی۔ جس میں ورکشاپ کے مقاصد و فوائد اور ا س کے انعقاد کے حوالے سے تفصیل سے گفتگو ہوئی۔اجلاس میں فیصلہ کیا گیا۔ کہ سی پیک،چترال کے قدرتی وسائل اور درپیش مسائل ورکشاپ کے موضوعات ہوں گے۔ اور ورکشاپ کے شرکاء موضوع کے حوالے سے اپنی آرا اور تجاویز پیش کریں گے۔ جو کہ چترال کیلئے ایک اہم دستاویز ہوگی۔ ورکشاپ میں یونیورسٹی کے اسا تذہ وطلبہ،سرکاری اور غیر سرکاری اداروں سے وابستہ افراد، سیاسی قائدین، کمیونٹی میں کام کرنے والی تنظیمات کے نمایندگان اور مختلف شعبوں سے تعلق رکھنے والی ایسوسی ایشنز کے ذمہ دار حصہ لیں گے۔ جنہیں اس ورکشاپ میں شرکت کی باضابطہ دعوت دی جائے گی۔ یاد رہے کہ گندھارا ہندکو بورڈ نے گذشتہ سال چترال میں زبان و ادب کے حوالے سے ایک عظیم الشان کانفرنس کا انعقاد کیا تھا۔ جس سے چترال کی ادبی انجمنوں کو اس ادارے کے ساتھ رابطہ کاری میں مدد ملی ہے۔ اور یادداشت پر دستخط کے نتیجے میں کتاب اور رسالے اس ادارے کے مالی تعاون سے چھپ چکے ہیں۔
