چترال (نمائندہ چترال میل) چترال میں کورونا کے تین مزید کیس کنفرم ہوگئے ہیں جسکے بعد ضلع لوئر چترال میں کورونا سے متاثرہ مریضوں کی تعداد چار ہوگئی۔ تفصیلات کے مطابق پیر کے روز چترال لوئر کے تین مریضوں کے کورونا ٹیسٹ پازیٹیو آگئے ہیں۔ جن مریضوں کے ٹیسٹ مثبت آئے ہیں ان میں شیر نوازولد خلیل خان برزین گرم چشمہ عمر 25سال جو کہ اپر دیر میں اسٹاف نرس کے طور پر کام کررہے تھے اور چترال آنے کے بعد 15تاریخ کو مقامی قرنطینہ مرکز میں تھے۔ شیر نواز کے بارے میں معلوم ہوا ہے کہ وہ کراچی بھی گئے ہوئے تھے۔ دوسرا مریض شمس اکبر ولد عبد الغفار سکنہ چمرکن جوکہ 18اپریل سے کامرس کالج چترال میں قائم قرنطینہ مرکز میں تھے۔ انکے بارے میں معلوم ہوا ہے کہ وہ کراچی سے واپس آئے ہوئے تھے۔ تیسرا مریض63سالہ رحمت ولی ولد عزیزاللہ توردہ چمرکن میں جو کہ اسلام آباد سے آئے ہوئے ہیں اور 18اپریل سے چترال کے قرنطینہ مرکزمیں موجود ہیں۔ ایک ہی دن تین مریضوں کا ٹیسٹ مثبت آنا نہایت تشویشناک صورتحال کی نشاندہی کرتی ہے۔ان حالات میں عوام کو چاہئے کہ احتیاطی ہدایات پر سختی سے عملدرآمد کریں تاکہ اس مرض کو پھیلنے سے روکا جاسکے۔