چترال (نمائندہ چترال میل) ڈسٹرکٹ ہیڈ کوارٹرز ہسپتال چترال کے سابق میڈیکل سپرنٹنڈنٹ اکبر شاہ نے اپنے تبادلے کے بعد گیارہ کلاس فور پوسٹوں پر مبینہ طور پر پچھلی تاریخ پر تقرری کردی ہے۔ ہسپتال کے موجودہ سپرنٹنڈنٹ ڈاکٹر محمد شمیم نے اس بات کی تصدیق کرتے ہوئے بتایاکہ سابق ایم ایس نے اپنی تبادلے کے آرڈر جاری ہونے کے بعد ہسپتال میں تین سویپر پوسٹ پرکام کرنے والے ملازمین کی بطور وارڈ اردلی کی پوسٹوں پر ایڈجسٹ کردی جبکہ پانچ افراد کو ریٹائرڈ ملازمین کے کوٹے پر اور تین فریش افراد کو کلاس فور پوسٹوں پر بھرتی کردی۔ انہوں نے کہاکہ اس ماہ کے اوائل میں ڈسٹرکٹ ہیڈکوارٹرز ہسپتال میں خالی 25کلاس فور پوسٹوں کے لئے انٹرویو ز مجاز حکام کی ہدایت پر منسوخ کردئیے گئے تھے اور نئی تاریخ کا ابھی اعلان بھی نہیں ہوا تھا۔ انہوں نے کہاکہ وہ سیکرٹری ہیلتھ کے نوٹس میں یہ بات لارہے ہیں تاکہ ان غیر قانونی بھرتیوں کو فی الفور کینسل کردئیے جائیں۔ ان کا کہنا تھاکہ انٹرویو منعقد کئے بغیر چوری چھپے کئے گئے ان غیر قانونی اور خلاف ضابطہ تقرریوں کو منسوخ کرادئیے جائیں گے۔