چترال (نمائندہ چترال میل ) تحصیل میونسپل افیسر قادر ناصر نے کہا ہے کہ 14اگست کو یوم آزادی کے موقع پر چترال شہر کو سجانے کی ذمہ داری ٹی ایم اے چترال کو تفویض کی گئی ہے جسے شایان شان انداز میں انجام دینے کی تیاری جاری ہے۔ مقامی میڈیا سے گفتگو کرتے ہوئے انہوں نے کہا ہے کہ اس سال عیدالاضحی کی وجہ سے جشن آزادی خصوصی اہمیت اختیارکرگئی ہے جبکہ اداروں کی بندش اور تعطیلات کی وجہ سے ٹی ایم اے کو انتظامات کے سلسلے میں مشکلات کا سامنا ضرور ہوگا لیکن ہم قومی جذبے سے اس کے لئے تیاری کررہے ہیں جس میں عام شہریوں کی مدد بھی درکار ہوگی۔ انہوں نے کہاکہ ٹی ایم اے کے واٹر ٹینکرز شہر کے مختلف علاقوں میں پانی پہنچانے کی ذمہ داریوں میں مصروف ہیں جن کی واٹر سپلائی گولین گول میں سیلاب سے متاثر ہوئے تھے۔