چترال (نمائندہ چترال میل) بدھ کی سہ پہر چترال ٹاؤن کے مغربی حصے میں چند سیکنڈز کی ہلکی بوندا باندی کے بعد اچانک کم شدت کا کلاؤڈ برسٹ کا واقعہ پیش آیا، جس کے نتیجے میں ہون نالہ میں طغیانی آگئی اور ایک بڑا سیلابی ریلی گزرا۔ خوش قسمتی سے نالے کے دونوں اطراف مضبوط حفاظتی دیواریں موجود ہونے کی وجہ سے سیلابی پانی قریبی انسانی بستیوں میں داخل نہیں ہو سکا اور آبادی کسی بھی بڑے نقصان سے محفوظ رہی۔سیلابی ریلے کے ساتھ آنے والے ملبے اور مٹی کی وجہ سے دریائے چترال کے پانی کی رنگت مکمل طور پر تبدیل ہو گئی ہے۔ہون نالہ میں طغیانی کے باوجود قریبی نالے چترال گول اور اوچوشٹ گول سیلابی پانی سے بالکل محفوظ رہے اور وہاں صورتحال معمول کے مطابق ہے۔مقامی رہنماؤں اور شہریوں کا کہنا ہے کہ بارش کا یہ سلسلہ بہت جلد تھم گیا، اگر یہ سلسلہ طویل ہوتا تو علاقے میں شدید تباہی پھیل سکتی تھی۔صوبائی ڈیزاسٹر مینجمنٹ اتھارٹی (PDMA) نے چترال کے دیگر حساس علاقوں گولین)، ارکاری اور مداک لشٹ میں گلیشیائی جھیلیں پھٹنے یعنی (GLOF) کے خطرے کے پیشِ نظر ضلعی انتظامیہ کو پہلے ہی ریڈ الرٹ پر رکھا ہوا ہے۔